Babasil (digər adı hemorroid) kişilər və qadınlar arasında çox geniş yayılmış xəstəlikdir. Dünya əhalisinin 10%-i bu patologiyadan əziyyət çəkir. Rastgəlmə tezliyinə görə babasil digər düz bağırsaq xəstəlikləri arasında 40% təşkil edir.
Xəstəlik Hippokrat dövründən məlumdur. “Hemorroid” termini yunancadan tərcümədə onun ən bariz əlaməti olan “qanaxma” mənasını verir. Əsasən bu xəstəlik 45 yaşdan yuxarı insanlarda daha sıx rast gəlinsə də, son zamanlar babasil gənc nəsli də əhatə edir.
Babasil “peşə xəstəliyi” kimi
Hemorroid düz bağırsağın ən aşağı hissəsində olan kiçik qan damarlarında durğunluğun olmasından qaynaqlanır. Nəticədə kiçik düyünşəkilli venoz genişlənmələr inkişaf edir.
Bu “peşə” xəstəliyi kimi çox vaxt oturaq həyat tərzi olan insanlarda məsələn, sürücülər, kompüter arxasında saatlarla işləyən ofis işçilərində rast gəlinir. Hemorroidin inkişafına tez-tez qəbizlik, hamiləlik və doğuş da zəmin yaradır. Bir sözlə, qarındaxili təzyiqin nəzərə çarpacaq dərəcədə artmasına səbəb olan bütün hallar babasilin inkişafına şərait yaradır. Risk qrupuna həddindən artıq çəkisi olan insanlar və tez-tez ağır yük qaldıranlar (fəhlə, idmançılar) daxildir.
Babasil özünü necə büruzə verir?
Babasilin əlamətləri onun ağırlıq dərəcəsindən asılıdır. Hemorroid tədricən, bir neçə il ərzində inkişaf edir. Bəzən erkən mərhələlərdə əlamətləri görmək mümkün olmur. Babasil gedişinə görə kəskin və xroniki, kliniki olaraq isə daxili, xarici, qarışıq formalara bölünür.
Hemorroid inkişaf mərhələsindən və formasından asılı olaraq, defekasiya aktı (nəcis ifrazı) zamanı ağrı, qaşınma, qanaxma, diskomfort hissi, qanlı-selikli ifrazatlar kimi narahatlıqlar törədir.
Babasil müalicə edilməzsə hansı fəsadları ola bilər?
Babasil xoşagəlməz hissiyyatla yanaşı, dəmir defisitli anemiya, tromboz və hemorroid düyünlərinin zədələnməsi kimi bir çox fəsadlara səbəb olduğundan təhlükəli sayılır.
Lakin insanların bir qismi mütəxəssislə məsləhətləşməkdən utanaraq, babasilin türkəçarə müalicəsinə əl atırlar. Bu isə xəstəliyin daha da inkişaf edərək, fəsadlaşmasına gətirib çıxarır. Belə hallara yol verməmək üçün babasilin əlamətləri ilə qarşılaşdıqda çəkinmədən və vaxt itirmədən həkim-proktoloqa müraciət etmək tövsiyə olunur.
Erkən mərhələlərdə hemorroidi cərrahi müdaxilə aparmadan müalicə etmək mümkündür. Lakin xəstəliyin ağırlaşmaları zamanı konservativ (dərmanla) müalicə arzuolunan nəticəni vermir. Belə vəziyyətlərdə babasil əməliyyatı effektiv hesab olunur.